Улуттук банктын 2025-жылдагы кирешесинин 100%ы өлкө казынасына которулат
Жогорку Кеңешке Улуттук банктын 2025-жылдын жыйынтыгы боюнча алынган таза кирешесинин 100%ын республикалык бюджеттин кирешесине которууну караган конституциялык мыйзам долбоору киргизилди.
Документке ылайык, кирешени бөлүштүрүүнү жана резервдерди түзүүнү жөнгө салган "Кыргыз Республикасынын Улуттук банкы жөнүндө" конституциялык мыйзамдын 12-беренесинин 4- жана 5-бөлүктөрүнүн колдонулушу убактылуу токтотулат жана 2025-жыл үчүн отчеттуулукка карата колдонулбайт. Каражаттарды которуу жылдык финансылык отчеттуулук көз карандысыз тышкы аудитор тарабынан тастыкталгандан кийин жүргүзүлөт.
Мыйзам долбоорунда ошондой эле мурда ушундай тартипти жөнгө салган 2025-жылдын 5-февралындагы №34 мыйзамды күчүн жоготту деп табуу сунушталууда.
Негиздеме-маалымкатта белгиленгендей, бул демилге социалдык маанидеги чыгымдарды каржылоо үчүн республикалык бюджеттин киреше бөлүгүн көбөйтүүгө багытталган. Документти Жогорку Кеңештин Регламентинин экономикалык туруктуулукка байланышкан мыйзам долбоорлору үчүн каралган нормаларына ылайык, кезексиз тартипте жана үч окууда бир учурда кароо сунушталууда.
Мыйзам долбоору бюджеттен кошумча чыгымдарды талап кылбайт жана башка нормативдик-укуктук актыларга өзгөртүүлөрдү киргизүүнү зарыл кылбайт.
