Оштогу тигүү фабрикасында 600дөй жумушчу орун түзүлөт
Улуттук инвестициялар агенттигинин жетекчиси Равшанбек Сабиров Кара-Суу районунун Кашгар-Кыштак айылында жайгашкан "Евразия Групп" компаниясынын тигүү фабрикасына иш сапары менен барды.
Сапардын негизги максаты — фабриканын экинчи этабын куруу боюнча инвестициялык долбоордун ишке ашырылышы менен таанышуу болду. Долбоордун биринчи жана кийинки этаптарын кошкондо жалпы инвестициянын көлөмү 40 миллион долларды түзөт.
Экинчи этаптын алкагында иштеп жаткан өндүрүштүк кубаттуулуктарды кеңейтүү, кошумча тигүү цехтерин куруу жана заманбап боёо цехин ишке киргизүү пландалууда. Бул этаптын ишке ашырылышы текстилдик кездемени өндүрүүдөн тартып даяр продукцияны тигүүгө чейинки толук өндүрүш циклин түзүүгө мүмкүндүк берет. Натыйжада текстилдик продукцияны импорттоого болгон көз карандылык азайып, жергиликтүү өндүрүштүн үлүшү жогорулайт.
Фабриканын кеңейиши менен 600дөн ашуун жаңы жумуш орундары түзүлөт. Бул Кара-Суу районунун жана жалпы Ош облусунун социалдык-экономикалык өнүгүүсүнө олуттуу салым кошот.
Равшанбек Сабиров долбоордун Кыргызстандагы жеңил өнөр жайын өнүктүрүүдөгү стратегиялык маанисин белгилеп, региондорду өнүктүрүүгө жана жумуш орундарын түзүүгө багытталган инвестициялык демилгелерге мамлекет ар тараптуу колдоо көрсөтүүгө даяр экенин баса белгиледи.
Эске салсак, фабрика 2024-жылы пайдаланууга берилген. Толук өндүрүштүк кубаттуулукка чыккандан кийин ишкана продукциясын Жакынкы Чыгыш өлкөлөрүнө, Түндүк Африкага, Европа Биримдигине жана КМШ мамлекеттерине экспорттоону пландап жатат.
