Россия Мамдумасынын депутаты жеңил өнөр жай импортуна КНС киргизүүнү сунуштады
Россиянын ЛДПР партиясынын төрагасы Леонид Слуцкий Россияда эле өндүрүлүп жаткан жеңил өнөр жай продукциясынын айрым түрлөрүнө импорт учурунда КНС (кошумча нарк салыгы) салууну сунуштады. Ал эми Россияда чыгарылбаган — чийки зат, кездемелер, фурнитура жана компоненттерди — бажы төлөмүсүз алып келүү режимин сактап калуу керектигин билдиргенин партиянын басма сөз кызматы маалымдады.
Ал өз билдирүүсүндө Россиянын коңшу өлкөлөрү — анын ичинде Кыргызстан, ошондой эле Өзбекстан жана Казакстан — ушуга окшош "коргоо чараларын" колдонуп жатканын өзгөчө белгиледи. Анын айтымында, бул мамлекеттер даяр продукцияга, анын ичинде Россиядан келген товарларга карата ушундай чараларды киргизип жатышат. Натыйжада рынокто диспропорция күчөп, россиялык бизнес "бардык тараптан кысымга алынып жатат.
Ушул логиканын негизинде ал импортту эки топко бөлүүнү сунуштайт: өндүрүш үчүн керектелген компоненттерди — бажы төлөмдөрүсүз жана "ашыкча салык басымысыз" алып келүү, ал эми кайра иштетүү деңгээли жогору болгон жана Россияда өндүрүлүп жаткан даяр товарларды — "тең шартта" салык системасына кошуп, КНС төлөтүү.
Кошумча чаралар катары ал локалдашкан өндүрүшү бар өндүрүүчүлөр үчүн маркетплейстердин комиссияларын төмөндөтүүнү жана жеңил өнөр жай тармагындагы ата мекендик товарлар үчүн кеминде 30% квота киргизүүнү сунуштады.
