"Кыргызалтын" минералдарды өндүрүүгө АКШ технологиясын киргизет
"Кыргызалтын" ачык акционердик коому B5+1 бизнес-форумунун алкагында АКШнын ири компаниялары — Pangea Global, Mooney Group, TETHYS Gateway Investment, ошондой эле Nasdaq фондулук биржасынын өкүлдөрү менен бир катар жолугушууларды өткөрдү.
Жолугушуулар "Кыргызалтын" ААКнын башкармалыгынын төрагасы Кубат Абдраимовдун жетекчилиги астында өттү.
Сүйлөшүүлөрдүн жүрүшүндө тараптар Кыргызстандын тоо-кен тармагын өнүктүрүүнүн келечеги, заманбап технологияларды киргизүү, лабораториялык изилдөөлөрдү күчөтүү, адистерди даярдоо жана ата мекендик өндүрүштү Европа Биримдигинин эл аралык стандарттарына жана талаптарына ылайык илгерилетүү маселелерин талкуулашты. Ошондой эле туруктуу өнөр жай экосистемасын калыптандыруу жана стратегиялык мааниге ээ минералдар жаатында кызматташтыкты кеңейтүү маселелерине өзгөчө көңүл бурулду.
Сүйлөшүүлөрдүн жыйынтыгында "Кыргызалтын" Pangea Global, Mooney Group жана TETHYS Gateway Investment компаниялары менен өз ара түшүнүшүү жөнүндө меморандумдарга кол койду.
Компаниялар тууралуу маалымат:
- Pangea Global энергетика тармагын өнүктүрүү, анын ичинде сейрек кездешүүчү жер элементтерин казып алуу технологиялары менен алектенет.
- Mooney Group стратегиялык мааниге ээ минералдар жана маанилүү металлдар тармагында инвестициялоо жана консалтинг кызматтарына адистешкен.
- TETHYS Gateway Investment — Түркия жана Борбор Азиядагы пайдалуу кендер, инфраструктура жана энергетика багытындагы долбоорлорго багытталган инвестициялык платформа.
- Nasdaq — дүйнөлүк капитал рыноктору үчүн инфраструктураны жана финансылык кызматтарды сунуштаган АКШнын фондулук биржасы жана технологиялык корпорациясы.
