Россияда 2026-жылы бензин кымбатташы мүмкүн
2026-жылы Россияда бензиндин баасы бир нече факторлордун таасири алдында өзгөрүшү мүмкүн экенин Prufy.ru сайты жазды. Алардын катарына салык жүгү, мунайды кайра иштетүүчү заводдордун (МКЗ) иши жана тышкы рыноктогу абал кирет.
Февраль айынын башында күйүүчү майдын дүң баасы 1,5%дан ашык төмөндөгөн. Базар бийликтин мунай продуктыларын экспорттоого карата жарым-жартылай тыюуну узартуу чечимин оң кабыл алды. Аналитиктердин пикиринде, мындай чара күйүүчү майдын кошумча көлөмүн өлкө ичинде кармап турууга жардам берип, суроо-талап жогору болгон мезгилдерде тартыштыктын алдын алат. Буга чейин дал ушул күйүүчү майдын жетишсиздиги баалардын кескин өсүшүнө себеп болуп келген.
2026-жылга карата жалпы божомолдор азырынча ар түрдүү. Экспорттоочулар жана импорттоочулар ассоциациясынын вице-президенти Артур Леер бензиндин баасы кескин өсөт деп күтпөй турганын айтты. Анын баамында, кымбаттоо акырындык менен жүрүп, бийлик болжолдогон инфляциянын деңгээлине — болжол менен 4%га — жакын болот.
Ошол эле учурда этият көз караштар да бар. "Альянс Тракс" коммерциялык транспорт дилердик борборлор тармагынын ээси Алексей Иванов жыл жыйынтыгында баанын өсүшү кыйла жогору болуп, 8%га чейин жетиши мүмкүн деп эсептейт. Анын айтымында, рынок кошумча нарк салыгынын (НДС) жана акциздердин жогорулашына буга чейин эле реакция кылган: жылдын алгачкы жумаларында күйүүчү майдын баасы болжол менен 1,3%га өскөн.
Кошумча тобокелдиктер, анын сөзү боюнча, жаз-жай мезгилинде мунайды кайра иштетүүчү заводдордун ишинде болушу мүмкүн болгон үзгүлтүктөргө, ошондой эле валюта курсунун өзгөрүшүнө байланыштуу. Эгер МКЗдер туруктуу иштеп, экспортко коюлган чектөөлөр жылдын ортосуна чейин сакталса, кескин секириктерден качууга болот. Бирок 2026-жылдын аягына чейин АИ-92 маркасындагы бензиндин баасы литрине 66–68 рублга, ал эми АИ-95 — 71–73 рублга чейин кымбатташы мүмкүн.
Финансы университетинин жана Улуттук энергетикалык коопсуздук фондунун эксперти Игорь Юшков да баанын өсүшүн инфляциянын чегинде кармап туруу кыйын болорун белгилейт. Анын пикиринде, көп нерсе тышкы саясий кырдаалга жараша болот. Эгер санкциялык басым алсырай турган болсо, мунай компанияларынын чыгымдары азайып, бул ички рынокто күйүүчү майдын баасынын өсүшүн ооздуктоого жардам бериши мүмкүн.
