“B5+1” Борбор Азия – АКШ бизнес-форуму өз ишин жыйынтыктады
Бишкек шаарында 211 компаниялардын жана уюмдардын 400гө жакын өкүлдөрү катышкан “B5+1” Борбор Азия – АКШ бизнес-форуму өз ишин жыйынтыктады. Алардын арасында жаңы чечимдерди, рынокторду жана кызматташуунун жаңы форматтарын калыптандырган алдыңкы жана ири компаниялар болгон.
Форумдун ишине регион өлкөлөрдөн жана Америка Кошмо Штаттарынын төмөнкүдөй бизнес-делегациялар катышты:
- Кыргызстан – 80 компания жана уюм;
- Казакстан – 35 компания жана уюм;
- Өзбекстан – 27 компания жана уюм;
- Тажикстан – 22 компания жана уюм;
- Түркмөнстан – 13 компания жана уюм;
- Америка Кошмо Штаттары – 34 компания жана уюм.
Форумдун жыйынтыгында экономика жана коммерция министринин орун басары Беназир Нурланова сөз сүйлөп, мындай кеңири өкүлчүлүктүн болгону иш жүзүндө кызматташууну кеңейтүүгө кызыгууну тастыктап турарын баса белгиледи.
“Биз америкалык өнөктөштөрүбүз жана CIPE уюму менен биргеликте форумдун ийгиликтүү өтүүсүнө олуттуу даярдыктарды көрдүк. Биздин максат - катышуучулар форумдан таасирленүү менен гана эмес, мындан ары өнүгүүгө багыт берген жаңы байланыштар, идеялар жана макулдашуулар менен кайтышы болчу. Талкуулардын активдүүлүгүнө жана өткөрүлгөн жолугушуулардын санына караганда, койгон максатыбызга жетиштик деп айтууга болот. “B5+1” форумунун иши практикалык кызматташтыктын ишенимдүү өсүшүн көрсөттү”, - деди министрдин орун басары.
Мындан кийинки кадам форумда талкууланган чечимдерди жана демилгелерди конкреттүү аракеттерге жана узак мөөнөттүү кызматташтыкка өткөрүү экендиги белгиленди.
Эскерте кетсек, 2025-жылдын ноябрындагы C5+1 лидерлеринин саммитинен кийин Эл аралык жеке ишкердик борбору (CIPE) министрлер кабинети менен биргеликте Бишкекте экинчи "B5+1" бизнес форумун өткөрдү. Биринчи жолу бул форум 2024-жылы Алматы шаарында өткөн.
