Быйыл Бишкек мектептерине 30 интерактивдүү панел сатылып алынат
2026-жылы Бишкек шаарындагы мектептер үчүн 30 интерактивдүү панель сатып алынарын Бишкек шаардык кеңешинин экономика, бюджет, финансы жана инвестициялар боюнча туруктуу комиссиясынын жыйынында Билим берүү департаментинин директору Рахат Мусаева билдирди.
Буга чейин депутат Эмир Марлисбеков тапшырык менен бекитилген бюджеттин ортосунда айырма бар экенин билдирген. Анын айтымында, баштапкы өтүнмөдө бюджет 866 млн 566 миң сом болсо, бекитилген долбоордо 851 млн 566 миң сом каралган.
Вице-мэр Виктория Мозгачева бул кыскартуу интерактивдүү панелдерди сатып алууга байланыштуу болгонун түшүндүрдү.
Анын айтымында, башында 100 интерактивдүү панель сатып алуу пландалган, бирок жыйынтыгында 30 гана панель бекитилген. Рахат Мусаеванын маалыматына ылайык, бир интерактивдүү панелдин баасы 128 миң сомду түзөт. 2026-жылга 30 панелге гана өтүнмө түшкөн, ал эми департамент кошумча дагы 70 панель сатып алууну сунуштаган.
Р.Мусаева интерактивдүү панелдер мектептерге түшкөн өтүнмөлөргө жараша бөлүштүрүлөрүн белгилеп, райондор боюнча бөлүштүрүү тууралуу маалыматты кийинчерээк берүүгө убада кылды.
Депутат Эмир Марлисбеков Октябрь районундагы мектептер интерактивдүү такталарга муктаж экенин айтып, бюджетке кошумча 70 интерактивдүү панель сатып алууну киргизүүнү сунуштады.
Ошондой эле Марлисбеков 10–11-класстын окуучулары үчүн жол кыймылынын эрежелери боюнча сабак киргизүүнү сунуш кылды. Вице-мэр Виктория Мозгачева бул боюнча Министрлер Кабинетинин чечими менен бүтүрүүчү класстар үчүн айдоочулукка окутуу жалпы билим берүү программасына киргизилгенинмаалымдады.
