Былтыр Кыргызстанда жер казынасын пайдалануу укугуна 26 аукцион өткөрүлгөн
2025-жылы Кыргызстанда жер казынасын пайдалануу укугуна 26 аукцион өткөрүлгөн. Бул тууралуу "B5+1" форумунун бизнес-эртең мененки жыйынында Эл аралык ишкердик кеңешинин (ЭИК) аткаруучу директору Аскар Сыдыков билдирди.
Ошондой эле ЭИК тарабынан мурда жер казынасын пайдаланууга 2005 лицензия берилгени маалымдалды. Анын ичинен 103 лицензия мамлекеттик ишканаларга таандык.
Буга чейин маалымдалгандай, Кыргыз Республикасынын аймагында пайдалуу кендердин 51 түрү боюнча 1 миңден ашык кен орундар жана көрүнүштөр бар. Алардын катарына алтын, күмүш, жез, сурьма, вольфрам, сейрек кездешүүчү жер элементтери кирет.
Өткөн жылдын алгачкы тогуз айында пайдалуу кендерди казып алуу тармагына тартылган түз чет өлкөлүк инвестициялардын (ТЧИ) көлөмү 190,3 млн долларды түзүп, бул өлкө экономикасына тартылган жалпы ТЧИнин 21,5%ына туура келген.
Кен казуу секторундагы инвестициялык динамика олуттуу өсүштү көрсөттү — көрсөткүчтөр 2024-жылдын ушул эле мезгилине салыштырмалуу эки эсе жогорулап, 203,5%ды түзгөнүн ЭИК белгиледи.
Мындан тышкары, эң келечектүү кен орундар катары Кутессай II, Калесай, Кызыл-Омпол, Түндүк Акташ, ошондой эле Зардалек жана Катранбашы алюминий кен орундар аталган.
