Быйыл Кыргызстанда айыл чарба продукциясын кайра иштетүүчү 75 ишкана ачылат
2026-жылы Кыргызстанда айыл чарба продукциясын кайра иштетүү боюнча 75 ишкананы ишке киргизүү пландалып жатканын Жогорку Кеңеш жыйынында суу ресурстары, айыл чарба жана кайра иштетүү өнөр жайы министри Бакыт Төрөбаев билдирди.
Анын айтымында, ишканалардын тизмеси ар бир региондун өзгөчөлүктөрү жана чийки зат базасынын жетиштүүлүгү эске алынуу менен түзүлгөн.
Мындан тышкары, 2030-жылга чейин айыл чарба продукциясын кайра иштетүү тармагында жаңы ачылган ишканалардын жалпы санын 385ке жеткирүү пландалып жатат.
Учурда республикада кайра иштетүү багытында 483 ири жана орто өнөр жай ишканасы, 40 соода-логистикалык борбор, 15 миңге жакын чакан ишкана, 264 жашылча-жемиш сактоочу кампа, ошондой эле 119 мал союучу пункт иштеп жатат.
