Ош шаарында таштандыдан электр энергиясын чыгаруучу завод курулат
Ош шаарында тиричилик таштандыларын кайра иштетүү жана электр энергиясын өндүрүүчү заманбап завод курулат. Концессиялык келишимди шаар башчысы Женишбек Токторбаев менен кытайлык "Цзюньсинь Хуаньбао Кей Джи Инвест" компаниясынын жетекчиси Дай Дао кол коюшканын түштүк борборунун мэриясы кабарлады.
Долбоор боюнча ишкана жылына 310 миң тоннага чейин таштандыларды кайра иштетип, электр энергиясына айландыра алат. Мэрия билдиргендей, завод экологиялык нормаларга жооп берип, айлана-чөйрөгө зыяндуу заттарды чыгарбайт.
Кыска мөөнөттө убакыт капсуласын салуу пландалууда. Заводдун ишке кириши 2027-жылдын аягына белгиленген.
Долбоор шаардык инфраструктураны кеңейтүүнүн жана таштандылардын көбөйүп жатканына байланыштуу көйгөйдү чечүүнүн алкагында ишке ашырылат.
