Жазгы талаа иштерине 40 миң тонна дизель, 9,7 миң тонна бензин сарпталат
Жазгы талаа иштерин жүргүзүү үчүн күйүүчү-майлоочу майлар жетиштүү болорун Жогорку Кеңештин агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында Суу ресурстары, айыл чарба жана кайра иштетүү өнөр жайы министри Бакыт Төрөбаев билдирди.
Анын айтымында, 2026-жылы 40 миң тонна дизель майы жана 9,7 миң тонна бензин талап кылынат.
"Нефтетрейдерлердин маалыматы боюнча, май куюучу жайларда жана мунай базаларында дизель майы жетиштүү көлөмдө бар. Дыйкандарды колдоо максатында Мамлекеттик материалдык резервдер фонду аркылуу 7 миллион литр дизель майы 74 сомдон сатылууда", — деди Бакыт Төрөбаев.
Ошондой эле ал жазгы талаа иштерин нормалдуу өткөрүү үчүн 182 миң тонна минералдык жер семирткичтер керек болорун кошумчалады.
"Бүгүнкү күнгө карата 22 миң тонна жер семирткич алып келинди, бул жалпы муктаждыктын 30%ын түзөт. Жер семирткичтерди сегиз компания ташып келүүдө, аларды 23төн 39 сомго чейин сатышууда. Быйыл жалпы айдоо аянты 1 млрд 250 млн гектарды түзөт, бул 2025-жылга салыштырмалуу 3,3 миң гектарга көп", — деп жыйынтыктады Бакыт Төрөбаев.
