Акыркы 5 жылда бюджет мүмкүнчүлүктөрү 3,5 эсеге кеңейди
2021-2025-жылдар аралыгында Кыргыз Республикасынын консолидацияланган бюджетинин ресурстары туруктуу өсүштү көрсөттү. Тактап айтканда, көрсөткүчтөр 313,1 млрд сомдон 1 101,4 млрд сомго чейин көбөйүп, беш жыл ичинде 3,5 эсеге өстү. Бул фискалдык саясаттын натыйжалуулугун жана мамлекеттик киреше булактарынын олуттуу кеңейгенин тастыктайт. Бул тууралуу Финансы министрлигинен билдиришти.
Маалыматтарга ылайык, мамлекеттик бюджеттин кирешелери 2021-жылдагы 209,8 млрд сомдон 2025-жылы 669,5 млрд сомго жетип, 3,2 эсеге өстү. Салык кирешелери 151,2 млрд сомдон 461,7 млрд сомго чейин көбөйүп, 3,1 эсеге өскөн. Салыктык эмес кирешелер 44,9 млрд сомдон 189,4 млрд сомго чейин өсүп, 4,2 эселик өсүштү түздү.
Мындай динамика санариптик инструменттердин киргизилиши, фискалдык администрлөөнүн жакшыртылышы жана финансылык сектордогу системалуу реформалардын натыйжасы болуп саналат.
Жетишилген көрсөткүчтөр өлкөнүн финансылык системасынын бекемделгенин, туруктуулугунун жогорулап жатканын жана мамлекеттик башкаруунун натыйжалуулугу артканын айкын көрсөтөт. Киреше базасынын кеңейиши жана башкаруу механизмдеринин өркүндөтүлүшү экономиканын туруктуу өнүгүшү үчүн кеңири мүмкүнчүлүктөрдү түзүүдө, - деп айтылат маалыматта.
