Былтыр Алматыга келген туристтер 2 миллионго жакындаган
2025-жылы Алматыга туристтердин агымы көбөйгөнүн Казинформ кабарлады.
Өткөн жылдын алгачкы тогуз айында шаарга дээрлик 1,87 млн адам келген, бул 2024-жылдын ушул мезгилине салыштырмалуу 8%га көп. Алардын ичинен 563 миңден ашыгы чет элдик туристтер, ал эми дагы 1,3 миллиону ички саякатчылар болгон.
Шаардын туризм башкармалыгынын маалыматы боюнча, тармакка инвестиция салуу да 39,4%га өсүп, 198,8 млрд теңгеге жеткен. Жеке инвестициялар Алматыда мейманкана жана курорттук жайларды камтыган 48 жаңы туристтик объект ачууга мүмкүндүк берген.
Өткөн жылы Алматы Bloomberg маалыматына ылайык, Борбордук Азиядагы эң тез өнүгүп жаткан 10 туристтик багыттын катарына кирген, ал эми CNN жана The Telegraph мегаполисти аймактын негизги туристтик борборлорунун бири деп атаган.
