Сүт алуучулар эми сүттү майлуулугуна жараша бекитилген тариф менен алышат
Суу ресурстары, айыл чарба, кайра иштетүү өнөр жайы министри Бакыт Төрөбаев Жогорку Кеңеште жазгы талаа иштери боюнча маалымат берип жатып, уй багуунун чыгымдары акталбай жаткандыгы жана сүттүн баасынын туруксуздугу боюнча депутаттын суроосуна жооп берди.
Анын айтымында, 2025-жылдын соңунан тарта сүт өндүрүүчүлөр менен аны кайра иштетүүчүлөрдүн ортосундагы сүттүн сапатына жараша баа саясатын жөнгө салуу чаралары тартипке салынганын билдирди. Ага ылайык, мурда сүт сатып алган "Белая Река", "Үмүт" сыяктуу заводдор сүттү бирдиктүү тариф менен (мисалы, 35 сомдон) сатып алса, эми министрликтин жаңы нускамасы боюнча баа сүттүн майлуулугуна жараша аныкталат.
"Азыркы учурда сүттүн майлуулугуна жараша атайын тарифтер (51, 49 жана 42 сом) аныкталды. Министрлик иштеп чыккан бул баалар жана нускамалар ар бир заводдун сүт кабыл алуу пункттарына милдеттүү түрдө илиниши керек", - деди ал.
Бакыт Төрөбаев сүттүн сапатына жараша баа коюу саясатынын маанисин түшүндүрдү. Анын айтымында, министрлик малдын санын эмес, сапатын жогорулатууга басым жасоодо. Бул максатта дыйкандарга асыл тукум мал өстүрүү үчүн жеңилдетилген насыялар берилүүдө.
Ошондой эле министр Бакыт Төрөбаев малдын асылдуулугун арттыруу, асыл тукум мал кармоону кеңири жайылтуу үчүн мамлекеттин эсебинен 61 млн сом бөлүнүп, асыл тукум порода малдын 270 миң доза уруктандыруу материалы сатып алынып, акысыз уруктандыруу иштери жүргүзүлүп жатканын билдирди.
