Таласта ишкердикке тоскоол болгон көйгөйлөр талкууланды
Талас шаарында региондогу чакан жана орто бизнестин өкүлдөрү менен көчмө эксперттик жолугушуу өткөрүлүп, анда системалуу тоскоолдуктар талкууланып, 2030-жылга чейинки Чакан жана орто ишкердикти (ЧОИ) өнүктүрүү программасына сунуштар иштелип чыкты. Бул тууралуу Экономика жана коммерция министрлигинен билдиришти.
Талкуунун негизги багыты жеке менчикти коргоо, административдик бөгөттөрдү жоюу жана бизнестин туруктуу өсүшүнө шарт түзүү маселелерине арналды.
Ишкерлер көтөргөн негизги маселелер:
- менчик укугун коргоо жана мурда таризделген укуктарды кайра кароого мораторий киргизүү;
- жеңилдетилген насыя алууда бюрократияны кыскартуу;
- ККМ жана POS-терминалдар аркылуу каражаттардын эсепке кеч түшүшү;
- чакан бизнес үчүн салык отчеттуулугун жөнөкөйлөтүү;
- продукцияны сертификациялоо үчүн регионалдык лабораториялардын жетишсиздиги.
Талас облусунда өнүгүү үчүн артыкчылыктуу багыттар катары мал чарбачылыгы жана кайра иштетүү, өсүмдүк өстүрүү, адистешкен нишалар (балчылык, балык чарбачылыгы, сувенир өндүрүшү), ошондой эле туризм жана мейманкана бизнеси аныкталды.
Жумушчу топтун эксперттери – ПРООН тарабынан Муктар Жумалиев жана ОБСЕ тарабынан Э. Жумабаев – бардык сунуштарды катташты. Алардын негизинде ЧОИ–2030 программасына сунуштар интеграцияланып, Талас облусунун инвестициялык жагымдуулугун жогорулатууга багытталат.
