Кыргызстандын текстиль өндүрүүчүлөрү Өзбекстандын рыногуна чыгууда
Кыргызстандын текстиль жана тигүү тармагынын өкүлдөрү "Экспорттук акселерация" программасынын алкагында Өзбекстанда өтүп жаткан үч күндүк бизнес-миссияга катышууда.
Экономика жана коммерция министрлигинин маалыматына ылайык, иш-чараны Кыргызстандын Өзбекстандагы Соода өкүлчүлүгү, "Кыргыз Экспорт" мамлекеттик мекемеси жана Текстилди өнүктүрүү борбору уюштурган.
Бизнес-миссияга экспорттук жеткирүүлөрдү кеңейтүүгө кызыкдар болгон 35тен ашык ишкананын 52 өкүлүкатышууда. Программанын негизги максаты – эки өлкөнүн ортосундагы соода-экономикалык кызматташтыкты чыңдоо жана кыргыз өндүрүүчүлөрүнүн Өзбекстандын рыногуна чыгуусуна көмөктөшүү.
Иш-чаранын алкагында делегация даяр кийим өндүрүүчүлөрүн бириктирген TFT Expo 2026 B2B эл аралык көргөзмөсүнө катышып, тармактагы жаңы тенденциялар менен таанышты жана потенциалдуу өнөктөштөр менен сүйлөшүүлөрдү өткөрдү.
Мындан тышкары, кыргызстандык ишкерлер Өзбекстандын ири маркетплейстеринин бири Uzum Marketкомпаниясынын өкүлдөрү менен жолугушуп, анын логистикалык борборунун иши менен таанышышты. Анда кыргыз продукциясын онлайн-платформа аркылуу сатуу жана жайгаштыруу маселелери талкууланды.
Ошондой эле бизнес-миссиянын жүрүшүндө төрт кыргызстандык ишкерге Өзбекстанда юридикалык жактарды каттоодо көмөк көрсөтүлдү. Бул аларга өлкөдө ишмердүүлүгүн баштап, продукциясын Uzum Market аркылуу сатууга мүмкүнчүлүк түзөт.
Программанын алкагында делегациянын өкүлдөрү Өзбекстандын "Уз Текс" жана Indigo Garments сыяктуу ири текстиль ишканаларына барып, өндүрүш процесси жана тармактагы тажрыйба менен таанышышты.
