Кыргызстанда курулуп жаткан жер семирткич заводу үчүн адистер Кытайда даярдалат
Кыргызстандын делегациясы Кытай Эл Республикасында жер семирткич өндүрүшүн өнүктүрүү боюнча кызматташуу маселелерин талкуулап, келечектеги завод үчүн адистерди даярдоо боюнча макулдашууларга кол койду.
Айыл чарба министрлигинин маалыматына ылайык, иш сапар Министрлер Кабинетинин буйругу менен түзүлгөн Кыргызстанда жер семирткич өндүрүүчү завод куруу боюнча ведомстволор аралык жумушчу топтун алкагында уюштурулду. Делегацияны Айыл чарба министринин биринчи орун басары Илич Марсбек уулу жетектеди.
Пекин шаарында мамлекеттик органдардын жана жеке компаниялардын өкүлдөрү менен сүйлөшүүлөр өтүп, Кыргызстанда жер семирткич өндүрүшүн өнүктүрүү боюнча кызматташуу мүмкүнчүлүктөрү талкууланды. Ошондой эле делегация Кытайдын Ички Монголия автономдуу районунда көмүрдөн жер семирткич өндүргөн ири ишкананын ишмердүүлүгү менен таанышты.
Мындан тышкары, Кыргызстанда курулуп жаткан жер семирткич өндүрүүчү заводдо эмгектене турган адистерди Кытайда окутуу жана өндүрүштүк тажрыйбадан өткөрүү боюнча кызматташтык тууралуу макулдашууларга кол коюлду.
Министрликтен белгилешкендей, бул демилге келечектеги ишкананы квалификациялуу кадрлар менен камсыз кылууга жана заманбап өндүрүштүк технологияларды өздөштүрүүгө өбөлгө түзөт.
