Ошто жаңы шаарча куруу боюнча инвестициялык келишим түзүлдү
Бүгүн Министрлер Кабинети менен “Куньлунь курулуш компаниясы” ЖЧКсынын ортосунда Ош шаарында масштабдуу инвестициялык долбоорду ишке ашыруу боюнча макулдашууга кол коюлду. Бул тууралуу Ош шаардык мэриядан билдиришти.
Кол коюу аземине Кыргыз Республикасынын Курулуш, архитектура жана турак жай-коммуналдык чарба министри Нурдан Орунтаев, Ош шаарынын мэринин биринчи орун басары Оморбек Торобаев жана инвестор компаниянын өкүлдөрү катышты.
Макулдашууга ылайык, Ош шаарында заманбап "Эне-Сай Сити" турак жай комплекси курулат. Ошондой эле долбоордун алкагында кеминде 688 жеке турак үй, бизнес-борборлор, мейманкана комплекси, эс алуу зоналары, социалдык жана инженердик инфраструктура объекттери салынат.
Долбоор шаарга ири көлөмдөгү инвестицияларды тартууга, жаңы жумуш орундарын түзүүгө, калктын жашоо шарттарын жакшыртууга жана Ош шаарынын инфраструктурасын өнүктүрүүгө багытталган.
Мындан тышкары, бул инвестициялык демилге шаардын экономикалык потенциалын кеңейтүүгө жана заманбап шаардык чөйрөнү калыптандырууга өбөлгө түзөрү белгиленди.
