Салык кызматы: Фискалдык система пилоттук долбоордо оң жыйынтык көрсөттү
Мамлекеттик салык кызматы 31-июлда маалыматтарды өткөрүп берүү функциясы бар фискалдык программалык камсыздоону (ФПК) киргизүү боюнча пилоттук долбоорду жыйынтыктайт.
Салык кызматынын маалыматына ылайык, пилоттук долбоор Бишкек, Манас жана Ош шаарларында коомдук тамактануу, мейманкана бизнеси, күйүүчү-майлоочу материалдарды сатуу, ошондой эле мончо жана сауна кызматтарын көрсөткөн ишкердик субъекттеринин катышуусунда жүргүзүлдү.
Жалпысынан 1,3 миңден ашык ишкердик субъект интеграциялоону ийгиликтүү аяктап, 2 миңден ашык объект системага кошулду.
Салык кызматынын маалыматына ылайык, долбоордун жыйынтыгында салыктык башкарууну жакшыртуу жана акчалай эсептешүүлөрдүн ачыктыгын камсыз кылуу боюнча оң көрсөткүчтөргө жетишилди.
Тактап айтканда, пилоттук долбоордун катышуучуларынын орточо суткалык түшкөн каражаты 2025-жылдын январь–июнь айларындагы 89,6 миң сомдон 2026-жылдын ушул эле мезгилинде 153,4 миң сомго чейин көбөйүп, өсүү 171,3%ды түзгөн.
Учурда Салык кызматы Экономика жана коммерция министрлиги менен биргеликте ФПКны этап-этабы менен киргизүү боюнча ченемдик укуктук актылардын долбоорлорун даярдоодо.
Белгиленгендей, тиешелүү ченемдик укуктук актылар күчүнө киргенге чейин пилоттук долбоордун катышуучулары ФПКны мурдагы тартипте колдоно беришет.
Ал эми 2026-жылдын 1-августунан тартып фискалдык программалык камсыздоо үзгүлтүксүз режимде иштеп, фискалдык маалыматтарды салык органдарынын маалыматтык системаларына автоматтык түрдө өткөрүп турат.
