Кыргызстандын мал чарба продукциясынын экспорттук мүмкүнчүлүгү кеңейүүдө
Ветеринария, мал чарбасын өнүктүрүү, жайыт жана тоют кызматы 2026-жылдын биринчи жарым жылдыгында аткарылган иштердин жыйынтыгын чыгарды. Бул тууралуу Айыл чарба министрлигинен билдиришти.
Маалыматка ылайык, экспорттук потенциалды кеңейтүү боюнча оң көрсөткүчтөргө жетишилди. Учурда Кытайга продукция экспорттоого 45, Өзбекстанга 54, Европа Биримдигине 71, Түркияга 13 жана Россия Федерациясына 19 ишкана катталган. Ошондой эле Кытай Эл Республикасы менен эт, субпродукт жана тери экспорттоо боюнча протоколдорду макулдашуу иштери уланууда.
Мал чарбасын асылдандыруу багытында республика үчүн 270 миң доза сапаттуу уруктук материал сатылып алынып, өлкө боюнча 302 жасалма уруктандыруу пункту иштеп жатат. Электрондук реестрге 232 асыл тукум субъект киргизилип, жарым жыл ичинде 46 миң 820 баш уй жасалма жол менен уруктандырылган.
Санариптештирүүнүн алкагында ветеринардык уруксат документтери электрондук форматта берилип, 2026-жылдын 15-июнунан тартып "Тулпар" маалыматтык системасы Россия Федерациясынын "Меркурий" системасы менен интеграцияланган. Мындан тышкары эпизоотиялык очокторду каттоо жана мониторинг жүргүзүү үчүн "СУМО" геомаалыматтык системасы ишке киргизилди.
Кызматтын маалыматына ылайык, алдыдагы мезгилде эпизоотиялык туруктуулукту камсыздоо, ветеринардык көзөмөлдү күчөтүү, малды идентификациялоону кеңейтүү, жасалма уруктандыруу иштерин көбөйтүү жана деградацияланган жайыттарды калыбына келтирүү негизги багыттардын бири болуп калат.
