Кыргызстандын мөмө-жемиштери Түркиянын рыногуна чыгышы мүмкүн
Экономика жана коммерция министрлигинде министрдин орун басары Беназир Нурланованын катышуусунда Түркиянын ишкерлер делегациясы, Кыргызстандын Стамбул шаарындагы Башкы консулу Чыңгыз Токтобеков жана ата мекендик өндүрүүчүлөр менен жолугушуу өттү.
Ведомствонун маалыматына ылайык, жолугушууда эки өлкөнүн соода-экономикалык жана инвестициялык кызматташтыгын кеңейтүү, мөмө-жемиш продукциясынын экспортун көбөйтүү, логистиканы жакшыртуу жана агроөнөр жай тармагындагы биргелешкен долбоорлор талкууланды.
Ошондой эле кыргызстандык экспорттоочулар менен түрк импорттоочуларынын ортосунда түз ишкердик байланыштарды өнүктүрүү жана ата мекендик өндүрүүчүлөрдүн экспорттук мүмкүнчүлүктөрүн кеңейтүү маселелерине көңүл бурулду.
Жыйынтыгында тараптар байланыш маалыматтары менен алмашып, түз кызматташууну өнүктүрүү боюнча макулдашышты. Мындан тышкары, "Агрокластер Мөмө-жемиштер" ассоциациясы менен түрк тарап кыргызстандын мөмө-жемиш продукциясын жеткирүү боюнча экспорттук келишимдерди түзүүгө ниет билдиришти.
Министрликтин маалыматына ылайык, бул кызматташтык мөмө-жемиш өндүрүү, кайра иштетүү жана экспорттоо боюнча биргелешкен долбоорлорду ишке ашырууга жана эки өлкөнүн ортосундагы соода алакаларын кеңейтүүгө өбөлгө түзөт.
