Асыл тукум мал өстүргөн фермерлерге 3% менен насыя берилет
Министрлер Кабинети асыл тукум мал чарбасын өнүктүрүүгө багытталган жеңилдетилген каржылоо программасын бекитти. Анын алкагында фермерлер жана тармактагы ишкерлер жылдык 3% үстөк менен 20 млн сомго чейин насыя ала алышат.
Айыл чарба министрлигинин маалыматына ылайык, жеңилдетилген каржылоо төмөнкү категорияларга берилет:
- асыл тукум заводдорго жана фермаларга;
- асыл тукум мал импорттоочуларга;
- жасалма уруктандыруу боюнча техниктерге;
- асыл тукум бодо мал, топоз, жылкы, кой жана эчки багып өстүргөн дыйкан (фермер) чарбаларга жана жеке ишкерлерге.
Насыянын мөөнөтү 60 айга чейин, ал эми жеңилдетилген мөөнөтү 12 айга чейин белгиленген. Бир насыянын максималдуу суммасы 20 млн сомду түзөт.
Министрлер Кабинети билдиргендей, программанын негизги максаты өлкөдөгү асыл тукум малдын санын көбөйтүү, малдын сапатын жакшыртуу жана фермерлердин өндүрүш мүмкүнчүлүктөрүн кеңейтүү болуп саналат.
Жеңилдетилген насыя алуу үчүн жарандар "АБанк" жана "Элдик Банк" аркылуу кайрыла алышат. Кошумча маалыматты райондук агрардык өнүктүрүү башкармалыктарынан же өнөктөш банктардан алууга болот.
