Гонконг компаниясы Кыргызстанга инвестиция салууга кызыкдар
Бүгүн Инвестициялар боюнча улуттук агенттиктин директору Равшанбек Сабиров Xinhua Panfeng Holdings Hong Kong Limited компаниясынын өкүлдөрү менен жолугушту.
Агенттиктин маалыматына ылайык, жолугушууда Кыргызстан менен Гонконгдун ортосундагы инвестициялык кызматташтыкты кеңейтүү жана өлкөнүн артыкчылыктуу тармактарына чет өлкөлүк инвестицияларды тартуу маселелери талкууланды.
Равшанбек Сабиров Улуттук агенттик эл аралык өнөктөштүктү өнүктүрүүгө жана өз ара пайдалуу инвестициялык долбоорлорду ишке ашырууга багытталган демилгелерди колдоого даяр экенин белгиледи.
Өз кезегинде компаниянын өкүлдөрү биргелешкен инвестициялык долбоорлорду ишке ашыруу, өнөр жай кооперациясын өнүктүрүү, заманбап технологияларды киргизүү жана Гонконгдун финансылык институттары менен кызматташууну кеңейтүү боюнча сунуштарын айтышты.
Тараптар ошондой эле өнөр жай, инфраструктура, кайра жаралуучу энергетика, логистика жана айыл чарба продукциясын кайра иштетүү тармактарындагы кызматташтык мүмкүнчүлүктөрүнө өзгөчө көңүл бурушту.
Жолугушуунун соңунда тараптар диалогду улантуу жана сунушталган инвестициялык демилгелерди биргелешип иштеп чыгуу боюнча макулдашышты.
