Нарында алты айда 1 млрд 171,1 млн сомдук өнөр жай продукциясы өндүрүлдү
Нарын шаарында 2026-жылдын биринчи жарым жылдыгынын социалдык-экономикалык өнүгүүсүнүн жыйынтыгы чыгарылды.
Шаар мэриясынын маалыматына ылайык, алты ай ичинде 1 млрд 171,1 млн сомдук өнөр жай продукциясыөндүрүлүп, өсүү темпи 117,5% болду.
Ошондой эле мамлекеттик бюджеттин киреше бөлүгү 107,6% аткарылып, өткөн жылдын ушул мезгилине салыштырмалуу өсүү темпи 142,7%ды түздү. Анын ичинен республикалык бюджет 114,1%, ал эми жергиликтүү бюджет 101,3% аткарылган.
Учурда Нарын шаарында жалпы баасы 7 млрд 810,2 млн сомду түзгөн 43 курулуш жана оңдоп-түзөө объектиси ишке ашырылууда.
Алардын ичинен 12 объект республикалык бюджеттин, 5 объект Кыргыз Республикасынын Турукташтыруу фондунун, 4 объект Нарын облусунун "Теңир-Тоо" өнүктүрүү фондунун, 8 объект инвесторлор менен демөөрчүлөрдүн, ал эми 14 объект жергиликтүү бюджет жана донорлордун эсебинен каржыланууда.
Жыйындын жүрүшүндө ички жолдорду тейлөө, шаардын санитардык тазалыгы, жашылдандыруу, таза суу жана саркынды суу системаларынын иши, муниципалдык менчикти башкаруу, билим берүү, саламаттык сактоо, социалдык камсыздоо, спорт жана маданият тармактарынын жыйынтыктары каралды.
Жыйындын соңунда Нарын шаарынын мэри Жылдызбек Беккелдиев тиешелүү мекеме-ишканалардын жетекчилерине кызмат көрсөтүүлөрдүн сапатын жакшыртуу жана белгиленген милдеттерди өз убагында аткаруу боюнча тапшырмаларды берди.
