Пластик менен текстиль калдыктарын кайра иштеткен ишканалар текшерилди
Жаратылыш ресурстары, экология жана техникалык көзөмөл министрлиги өлкөдө калдыктарды кайра иштетүүчү ишканаларды лицензиялоо жана колдоо иштерин жүргүзүүдө.
Министрликтин маалыматына ылайык, бул чаралар циркулярдык экономиканы өнүктүрүү, өндүрүүчүлөрдүн кеңейтилген жоопкерчилиги системасын киргизүү жана кайра иштетүүчүлөрдүн санариптик реестрин түзүү максатын көздөйт.
Лицензия алдындагы көзөмөлдүн алкагында картон, пластик жана текстиль калдыктарын кайра иштеткен, ошондой эле полимердик баштыктарды чыгарган "Алтын Ажыдаар", "Эллегия", "Ак-Кайын", "Профикс-Юг", "Дукастомс" жана "Датка Кей Джи" ЖЧКларына текшерүү жүргүзүлдү.
Бул ишканалар макулатура менен картон калдыктарын таңгактоочу кагазга жана гофрленген картонго айлантат. Текстиль калдыктарынан термокийиз, килем жана башка тиричилик буюмдары өндүрүлөт.
Ал эми ПЭТ бөтөлкөлөрүнөн экспортко жөнөтүлүүчү флекс даярдалат. Полимердик калдыктардан чака, пластик түтүк, щетка жана башка чарбалык буюмдар чыгарылат.
Министрлик кайра иштетилүүчү калдыктардын түрүн көбөйтүү, жашыл долбоорлорду колдоо, мамлекеттик преференцияларды берүү жана калдыксыз технологияларды жайылтуу боюнча иштер улантыларын билдирди.
Ошондой эле кайра иштетүү тармагында иштеген бардык ишкерлер мыйзам талаптарына ылайык өз ишмердүүлүгүн өз убагында лицензиялоого чакырылды.
