Өкмөттө күйүүчү майдын кору жана камсыздоо маселеси каралды
Министрлер Кабинетинин төрагасынын биринчи орун басары Данияр Амангелдиев өлкөнүн ички рыногун күйүүчү-майлоочу материалдар менен үзгүлтүксүз камсыздоо маселеси боюнча кезектеги жыйын өткөрдү.
Министрлер Кабинетинин басма сөз кызматынан билдиргендей, жыйындын жүрүшүндө тиешелүү мамлекеттик органдардын жетекчилери күйүүчү май рыногундагы учурдагы абал, кампалардагы күйүүчү майдын запастары жана өлкөнү мунай продуктулары менен камсыздоо боюнча маалымат беришти.
Ошондой эле күйүүчү май менен туруктуу камсыздоону камсыз кылуу, кампалардагы корду жетиштүү деңгээлде кармоо жана мамлекеттик органдар менен рыноктун катышуучуларынын өз ара иш алып баруусун күчөтүү маселелерине өзгөчө көңүл бурулду.
Жыйындын соңунда тиешелүү мамлекеттик органдарга жана жооптуу уюмдарга күйүүчү май рыногундагы туруктуулукту камсыздоого багытталган бир катар тапшырмалар берилди.
