Ноокенде заманбап логистикалык борбор куруу пландалууда
Шаар куруу жана архитектура департаментинин Ноокен райондук шаар куруу жана архитектура башкармалыгы Жалал-Абад облусунун Ноокен районундагы Кызыл-Туу айылынын Кен-Сай тилкесинде курула турган мөмө-жемиштерди сактоочу транспорттук-логистикалык борбордун эскиздик долбоорун иштеп чыкты.
Курулуш министрлигинин маалыматына ылайык, долбоор айыл чарба продукцияларын сактоо, кайра иштетүү жана ташуу үчүн заманбап инфраструктураны түзүүгө багытталган. Борбордун курулушу түшүмдү сапаттуу сактоого, продукцияны ички жана тышкы рынокторго өз убагында жеткирүүгө, ошондой эле аймактын логистикалык мүмкүнчүлүктөрүн кеңейтүүгө шарт түзөт.
Учурда эскиздик долбоор тиешелүү кароо жол-жоболорунан өткөрүлүүдө. Аны ишке ашыруу аймактын инфраструктурасын өнүктүрүүгө жана жаңы жумуш орундарын түзүүгө өбөлгө болот.
