А. Касымалиев Евразия өкмөттөр аралык кеңешинин тар курамдагы жыйынына катышты
Министрлер Кабинетинин төрагасы Адылбек Касымалиев Евразия өкмөттөр аралык кеңешинин (ЕӨАК) тар курамдагы жыйынына катышты. Бул тууралуу Өкмөттүн басма сөз кызматынан билдиришти.
Жыйындын алдында ЕАЭБге мүчө мамлекеттердин өкмөт башчыларын расмий тосуп алуу аземи жана биргелешкен сүрөткө түшүү иш-чарасы өттү. Андан соң өкмөт башчылары экономикалык интеграцияны тереңдетүү, соодадагы тоскоолдуктарды жоюу жана көп тараптуу кызматташтыкты өнүктүрүүгө байланышкан маселелерди талкуулоого өтүштү.
Адылбек Касымалиев катышуучуларга кайрылып, Армениянын Премьер-министри Никол Пашинянды парламенттик шайлоодогу жеңиши жана өкмөт башчысы болуп дайындалышы менен куттуктады.
Ошондой эле ал Президент Садыр Жапаровдун сөзүнө таянып, Биримдиктин алкагындагы кабыл алынган макулдашууларды толук ишке ашыруунун, товарлардын эркин жүгүртүлүшүн тездетүүнүн жана рынокторго жеткиликтүүлүктү кеңейтүүнүн маанилүүлүгүн белгиледи.
Куттуктоо сөздөрүнөн кийин Евразия өкмөттөр аралык кеңешинин төрагалыгы Казакстандын Премьер-министри Олжас Бектеновго өткөрүлүп, жыйын жабык форматта улантылды.
ЕӨАКтын тар курамдагы жыйынына Армения, Беларусь, Казакстан, Кыргызстан жана Россиянын өкмөт башчылары, ошондой эле Евразия экономикалык комиссиясынын Коллегиясынын төрагасы Бакытжан Сагинтаев катышты.
Евразия өкмөттөр аралык кеңешинин кеңейтилген курамдагы жыйыны 7-августта уланат. Анда Евразия экономикалык биримдигинин күн тартибиндеги 15тен ашуун маселе каралат.
