Кыргызстан менен Россия жаңы инвестициялык долбоорлорду талкуулады
Чолпон-Ата шаарында VIII Кыргызстан–Россия экономикалык форуму жана XII Кыргызстан–Россия аймактар аралык конференциясы расмий ачылды. Иш-чара 6-7-августта өтө турган Евразия өкмөттөр аралык кеңешинин жыйынынын алдында уюштурулду. Бул тууралуу Министрлер Кабинетинин басма сөз кызматынан билдиришти.
Форум Президент Садыр Жапаров менен Россия Федерациясынын Президенти Владимир Путиндин катышуучуларга жолдогон видеокайрылуулары менен башталды.
Ачылыш аземинде Министрлер Кабинетинин төрагасы Адылбек Касымалиев сөз сүйлөп, Кыргызстан менен Россиянын ортосундагы стратегиялык өнөктөштүк жана союздаштык мамилелерди чыңдоо өлкөнүн тышкы саясатынын артыкчылыктуу багыты бойдон каларын белгиледи.
Анын айтымында, форум эки өлкөнүн кызматташтыгын кеңейтүүгө, биргелешкен долбоорлорду ишке ашырууга жана аймактар аралык байланыштарды бекемдөөгө өбөлгө түзгөн маанилүү аянтча болуп саналат.
"Бул жөн гана пикир алмашуу аянтчасы эмес. Бул жерде конкреттүү чечимдер кабыл алынып, биргелешкен долбоорлор ишке киргизилип, өлкөлөрдүн бизнес өкүлдөрү менен аймактарынын ортосундагы түз байланыштар чыңдалат", – деди Адылбек Касымалиев.
Өкмөт башчы Кыргызстанда экономиканы модернизациялоо, инвестициялык климатты жакшыртуу, өнөр жайды, энергетиканы, транспортту жана туризмди өнүктүрүү боюнча ырааттуу иштер жүрүп жатканын белгилеп, кыргыз тарап россиялык өнөктөштөр менен жаңы инвестициялык долбоорлорду ишке ашырууга кызыкдар экенин айтты.
Ошондой эле ал аймактар аралык кызматташтык практикалык байланыштарды күчөтүп, эки өлкөнүн ишкерлери үчүн жаңы мүмкүнчүлүктөрдү түзөрүн белгиледи.
Сөзүнүн соңунда Адылбек Касымалиев форумдун жыйынтыгы кыргыз-орус экономикалык өнөктөштүгүн чыңдоого, соода-экономикалык, инвестициялык жана технологиялык кызматташтыкты кеңейтүүгө олуттуу салым кошоруна ишеним билдирди.
