Касымалиев ЕАЭБде азык-түлүк коопсуздугун күчөтүүгө чакырды
Министрлер Кабинетинин төрагасы Адылбек Касымалиев Евразия өкмөттөр аралык кеңешинин кеңейтилген курамдагы кезектеги жыйынында азык-түлүк коопсуздугун камсыздоо маселесине өзгөчө көңүл бурду. Бул тууралуу Өкмөттүн басма сөз кызматынан билдиришти.
Ал буга чейин тар чөйрөдө азык-түлүк коопсуздугун камсыздоо боюнча биргелешкен аракеттер кеңири талкууланганын белгиледи.
Адылбек Касымалиев Кыргыз Республикасынын президенти Садыр Жапаров Жогорку Евразия экономикалык кеңешинин жыйынында агроазык-түлүк секторун чыңдоо жана калкты коопсуз, жеткиликтүү азык-түлүк менен камсыз кылуу үчүн конкреттүү чараларды жана механизмдерди макулдашуу зарылдыгын белгилегенин эске салды.
Министрлер Кабинетинин төрагасы дүйнөлүк азык-түлүк бааларынын өсүшүнө да көңүл буруп, азык-түлүк инфляциясы социалдык чыңалуунун булагына айланып жатканын белгиледи.
Ушуга байланыштуу ал Евразия экономикалык комиссиясы айыл чарба рынокторундагы кырдаалга активдүү мониторинг жүргүзүүнү улантышы керектигин билдирди.
Ошондой эле мүчө мамлекеттерден алынган маалыматтардын негизинде тартыштык же баалардын жогорулашы күтүлгөн учурларда тобокелдиктерди ыкчам жумшартууга багытталган чечимдерди кабыл алуу үчүн Биримдиктин органдарына өз убагында сунуштарды киргизүүнүн маанилүүлүгүн белгиледи.
