Ошто агроөнөр жай тармагын өнүктүрүү боюнча көчмө жыйын өттү
6-7-август күндөрү Ош шаарында Дүйнөлүк банктын каржылоосунда министрлик тарабынан ишке ашырылып жаткан "Ош облусунун жана Ош шаарынын аймактык экономикалык өнүгүүсү" долбоорунун алкагында Өндүрүмдүү өнөктөштүк комитетинин көчмө жыйыны өттү. Бул тууралуу Айыл чарба министрлигинен билдиришти.
Жыйынга министрдин орун басары Мирбек Дүйшеев жана Комитеттин мүчөлөрү катышты.
Көчмө жыйындын алкагында катышуучулар кошумча нарк чынжырлары боюнча ишке ашырылып жаткан долбоорлор менен жеринде таанышып, алардын өндүрүштүк мүмкүнчүлүктөрүнө баа беришти.
Иш сапардын жүрүшүндө Комитеттин мүчөлөрү "Натурал Хозяйство" дыйкан чарбасына, "Шермамат" фермердик-өндүрүштүк чарбасына, "Зиябидин Ата" дыйкан чарбасына, "ББК Групп" ЖЧКсына, "Ош облусунун асан-үсөн форелин өндүрүүчүлөр ассоциациясы" коомдук бирикмесине, "Тоок Ордо" дыйкан чарбасына, "Большевик багбандар биримдиги" коомдук бирикмесине, "Элдик Техсервис" айыл чарба кооперативине, "Ала Тоо Амир" жана "Эко Азык" ЖЧКларына, "Абдрашит Ата" дыйкан чарбасына барышты.
Ошондой эле мөмө-жемиштерди жана жашылчаларды акустикалык жана интенсивдүү тоңдуруу багытында ишке ашырылып жаткан өндүрүш объектилеринин иши менен таанышышты.
Объектилерди кыдыруу учурунда долбоорлордун ишке ашырылышы, өндүрүштүк кубаттуулуктар жана ишканалардын өнүгүү мүмкүнчүлүктөрү талкууланды. Мындан тышкары, аларды мындан ары колдоо жана аймактагы кошумча нарк чынжырларын өнүктүрүү маселелерине көңүл бурулду.
Көчмө жыйын долбоорлордун потенциалын жеринде баалоого, ошондой эле Ош облусунда агроөнөр жай тармагын өнүктүрүүгө багытталган демилгелерди колдоонун артыкчылыктуу багыттарын аныктоого мүмкүнчүлүк түздү.
