СПОТ системасы жана товарларды Россияга ташып кирүү жол-жоболору талкууланды
Экономика жана коммерция министрлигинде Россия Федерациясынын делегациясы менен ата мекендик жеңил өнөр жай тармагынын өкүлдөрүнүн жолугушуусу өттү.
Ведомствонун маалыматына ылайык, жолугушууга Россия Федерациясынын финансы министринин орун басары — статс-катчы Алексей Сазанов, Федералдык салык кызматынын жетекчисинин орун басары Александр Егоричев, ошондой эле Федералдык бажы кызматынын өкүлдөрү катышты.
Жолугушуунун жүрүшүндө Александр Егоричев СПОТ системасынын иштөө тартиби, QR-код алуу, камсыздоо төлөмүн киргизүү жана товарларды Россия Федерациясынын аймагына ташып кирүүдө колдонулуучу контролдук жол-жоболор тууралуу кеңири маалымат берди.
Өз кезегинде ата мекендик ишкерлер документтерди тариздөөдө, жүктөрдү чек арадан өткөрүүдө жана текшерүү жол-жоболорунда жаралып жаткан көйгөйлүү маселелерди көтөрүп, аларды чечүү боюнча сунуш-пикирлерин билдиришти.
Жолугушуунун жыйынтыгында ишкерлер тарабынан көтөрүлгөн маселелерди жана кайрылууларды ыкчам кароо, ошондой эле тараптардын өз ара аракеттенүүсүн күчөтүү максатында эки тараптуу жумушчу топ түзүү тууралуу макулдашууга жетишилди.
