Оштун бюджетине бир айда 160 млн сом кошумча киреше түштү
Ош шаарынын жергиликтүү бюджетине үстүбүздөгү айда 160 млн сом кошумча киреше түштү. Бул тууралуу Ош шаарынын мэриясынан билдирди.
Буга чейин Президент Садыр Жапаровдун чечими менен салыктын эки түрү — бирдиктүү салык жана сатуудан алынуучу салык Ош шаарынын жергиликтүү бюджетинде калтырылган.
Ош шаарынын мэри Жанар Акаевдин айтымында, кошумча түшкөн каражаттар калаанын инфраструктурасын жакшыртууга багытталат.
Калаа башчысы ишкерлерди көмүскө экономиканын үлүшүн азайтууга, ишкердикти мыйзам талаптарына ылайык жүргүзүүгө жана салыктарды өз убагында төлөөгө чакырды.
"Салык — шаардын өнүгүүсүнө түздөн-түз салым. Түшкөн каражаттар жолдорду, инфраструктураны жана шаардык чөйрөнү жакшыртууга жумшалат", — деди Жанар Акаев.
Кошумча түшкөн каражаттардын эсебинен шаардагы жолдорду жана инфраструктуралык объектилерди жакшыртуу, ошондой эле шаардык чөйрөнү өнүктүрүү боюнча иштерди жүргүзүү каралууда.
