Кыргызстан менен Швейцария эл аралык автоташуулар боюнча келишимге кол койду
Кыргызстан менен Швейцариянын ортосунда жүргүнчүлөрдү жана жүктөрдү автомобиль транспорту менен эл аралык ташуу боюнча Өкмөттөр аралык келишимге кол коюлду. Бул тууралуу Транспорт жана коммуникациялар министрлигинин маалымат кызматы билдирди.
Бүгүн транспорт жана коммуникациялар министри Талантбек Солтобаев Швейцариянын Кыргызстандагы Атайын жана Ыйгарым укуктуу Элчиси Сироко Мессерли менен жолугушту.
Тараптар эки өлкөнүн ортосундагы эл аралык автомобиль ташууларын өнүктүрүү жана транспорттук кызматташтыкты кеңейтүү маселелерин талкуулашты.
Министр Талантбек Солтобаев келишимге кол коюу Кыргызстан менен Швейцариянын транспорт тармагындагы кызматташтыгын мындан ары өнүктүрүүдө маанилүү кадам экенин белгиледи.
Келишим эки өлкөнүн ортосунда жүргүнчүлөрдү жана жүктөрдү автомобиль транспорту менен ташууга, ошондой эле алардын аймактары аркылуу транзиттик каттамдарды уюштурууга укуктук негиз түзөт.
Документ транспорттук байланышты кеңейтүүгө, соода-экономикалык кызматташтыкты, бизнести жана туризмди өнүктүрүүгө, ошондой эле жарандардын мобилдүүлүгүн жогорулатууга багытталган.
Жолугушуунун жыйынтыгында Кыргызстандын Министрлер Кабинети менен Швейцариянын Федералдык Кеңешинин ортосунда тиешелүү Өкмөттөр аралык келишимге кол коюлду.
