Президенттик администрацияда ишкерликке тоскоол болгон көйгөйлөр талкууланды
Күн мурун Президенттик администрацияда бизнес-ассоциациялардын жетекчилери менен жумушчу жолугушуу өттү. Бул тууралуу Президенттик администрациядан билдиришти.
Жолугушууну Президенттин өзгөчө тапшырмалар боюнча атайын өкүлү Бакыт Торобаев өткөрдү. Анда мамлекет менен бизнестин кызматташуусу жана ишкерлер менен мамлекеттик органдардын ортосундагы диалогду жакшыртуу маселелери талкууланды.
Бакыт Торобаев ишкерлердин өлкө экономикасын өнүктүрүүгө, жаңы жумуш орундарын түзүүгө жана экономикалык өсүштү камсыздоого кошкон салымын белгиледи. Ошондой эле ишкердикке тоскоол болгон системалык көйгөйлөрдү жоюу зарылдыгына көңүл бурду.
Бизнес-ассоциациялардын жетекчилери мамлекеттик органдар менен кызматташууну жакшыртуу боюнча сунуштарын айтып, ишкерлерди түйшөлткөн актуалдуу маселелерди көтөрүштү.
Жыйынтыгында мамлекет менен бизнестин диалогун натыйжалуу жүргүзүү, ишкерлердин демилгелерин ыкчам кароо жана системалык маселелерди чечүү үчүн кызматташуунун жаңы форматтарын иштеп чыгуу сунушталды.
Мындан тышкары, илимди өнүктүрүү, кадрларды даярдоо жана алардын квалификациясын жогорулатуу маселелерине көңүл бурулду. Катышуучулар жагымдуу бизнес-чөйрөнү түзүүдө билим берүү, илим жана бизнестин тыгыз кызматташуусу маанилүү экенин белгилешти.
