Кыргызстан менен Россия балык жана мал чарбасы боюнча кызматташтыкты кеңейтет
Алматы шаарында Министрлер Кабинетинин төрагасынын орун басары – министр Эрлист Акунбеков менен Россиянын айыл чарба министри Оксана Лут жолугушту. Бул тууралуу Айыл чарба министрлигинин басма сөз кызматынан билдиришти.
Жолугушууда балык чарбасы, асыл тукум мал чарбачылыгы жана минералдык жер семирткичтерди жеткирүү маселелери талкууланды.
Кыргыз тарап Россиянын өзгөчө экономикалык аймагында суу биоресурстарын кармоого жыл сайын квота берүү мүмкүнчүлүгүн карап чыгууну сунуштады. Бул балыкты кайра иштетүүгө жана ата мекендик аквакультураны өнүктүрүүгө шарт түзөрү белгиленди.
"Эки тараптын колдоосу менен зарыл болгон жол-жоболорду аяктап, сентябрь айында Санкт-Петербург шаарында өтө турган балык өнөр жай форумунун алкагында Протоколго кол коюуга жетишебиз деп ишенебиз", — деди Эрлист Акунбеков.
Ошондой эле Кыргызстан 20 миң башка чейин асыл тукум бодо мал жеткирүүгө жана майда жандыктар боюнча кызматташтыкты кеңейтүүгө кызыкдар экенин билдирди.
Мындан тышкары, Россиядан минералдык жер семирткичтерди жеткирүүнүн көлөмүн көбөйтүү жана өндүрүүчүлөр менен түз узак мөөнөттүү келишимдерди түзүү маселеси талкууланды.
Тараптар биргелешкен долбоорлорду ишке ашыруу боюнча кызматташууну улантууга даяр экенин билдиришти.
