Кыргызстан Кытайдан 10 миң тонна жер семирткич алууну пландоодо
Бүгүн Суу ресурстары, айыл чарба жана кайра иштетүү өнөр жайы министрлигинде минералдык жер семирткичтерди жеткирүү боюнча алдын ала макулдашууга кол коюлду.
Министрликтин маалыматына ылайык, документке "Кыргыз Агрохолдинг" ААКсы менен Кытайдын Beijing Huafu Engineering Co., Ltd. (HFEC) компаниясынын өкүлдөрү кол коюшту. Иш-чарага министрдин биринчи орун басары Илич Марсбек уулу катышты.
Макулдашууга ылайык, Кыргызстанга биринчи партияда кеминде 10 миң тонна жогорку сапаттагы карбамид жеткирүү пландалууда. Бул дыйкандарды минералдык жер семирткичтер менен өз убагында камсыздоого багытталган.
"Карбамиддин жеткиликтүү жана өз убагында жеткирилиши дыйкандарыбызга түшүмдүүлүктү жогорулатууга жана өлкөнүн айыл чарбасынын туруктуу өнүгүшүн камсыз кылууга мүмкүндүк берет", — деди Илич Марсбек уулу.
Министрликтен белгилешкендей, кызматташуу жер семирткичтерди туруктуу жеткирүүгө жана жазгы-талаа, күзгү айыл чарба жумуштары маалында тартыштык тобокелдигин азайтууга багытталган.
