Кызмат көрсөтүү тармагынын көлөмү 908,7 млрд сомго жетти
Үстүбүздөгү жылдын январь-июль айларынын жыйынтыгы боюнча Кыргызстанда кызмат көрсөтүү тармагынын дүң көлөмү 908,7 млрд сомду түзүп, өткөн жылдын тиешелүү мезгилине салыштырмалуу 6,2%га өстү. Бул тууралуу Экономика жана коммерция министрлиги маалымдайт.
Кызмат көрсөтүү тармагы мурдагыдай эле өлкөнүн экономикалык өсүшүнүн негизги кыймылдаткычтарынын бири бойдон калууда. Анын ИДПнын өсүшүнө кошкон салымы 3,25%дык пунктту түзүп, ИДПнын түзүмүндөгү үлүшү 49,8%га жетти.
Отчеттук мезгилде дүң жана чекене сооданын, ошондой эле автоунааларды жана мотоциклдерди оңдоо кызматтарынын жалпы көлөмү 281,7 млрд сомду түзүп, 8,4%га өстү. Ошол эле учурда өсүү темпи 2025-жылдын ушул мезгилиндеги 18,6%га салыштырмалуу жайлаган.
Министрликтин маалыматына ылайык, буга дүң соодадагы активдүүлүктүн төмөндөшү, Чүй облусундагы ири ишканалардын биринин иш көлөмүнүн кыскарышы, ошондой эле күйүүчү-майлоочу материалдарды, фармацевтикалык продукцияларды жана металлдарды дүң сатуу көлөмүнүн азайышы таасир эткен.
Ал эми чекене соода жогорку өсүү динамикасын сактап, 14,9%га көбөйдү. Салыштыруу үчүн, 2025-жылдын тиешелүү мезгилинде өсүү 13,4%ды түзгөн.
Чекене сооданын өсүшүнө калктын кирешелеринин көбөйүшү оң таасирин тийгизген. 2026-жылдын январь-июнь айларында орточо айлык номиналдык эмгек акы 27,5%га жогорулаган.
Мындан тышкары, керектөө кредиттеринин көлөмүнүн кеңейиши да соодадагы активдүүлүккө түрткү берген. 2026-жылдын алты айында берилген керектөө кредиттеринин көлөмү 2025-жылдын аягына салыштырмалуу 16,5%га, ал эми өткөн жылдын тиешелүү мезгилине салыштырмалуу 51%га өскөн.
