Өлкөдө жети айда 525 млрд сомдук өнөр жай продукциясы өндүрүлдү
2026-жылдын январь-июль айларында Кыргызстанда өнөр жай ишканалары 525,3 млрд сомдук дүң продукция өндүрдү. Өндүрүш көлөмү өткөн жылдын ушул мезгилине салыштырмалуу 11,2%га өстү. Бул тууралуу Экономика жана коммерция министрлигинен билдиришти.
Өсүш тамак-аш азыктарын, суусундуктарды жана тамеки продукцияларын өндүрүүдө 2,4%ды, негизги металлдарда 8,5%ды, фармацевтикалык продукцияда 13%ды түздү.
Курулуш материалдарын өндүрүү 33,6%га, жыгач жана кагаз буюмдары, полиграфиялык продукция 37,5%га, транспорт каражаттары 41,8%га көбөйдү. Тазаланган мунай продукцияларын өндүрүү 1,8 эсеге, химиялык продукция 2,9 эсеге өстү. Пайдалуу кендерди казып алуу 16,9%га көбөйдү.
Ошол эле учурда текстиль жана кийим өндүрүшү 7,1%га төмөндөдү. Бул Россиядагы пилотсуз учуучу аппараттардын чабуулдарынан улам Wildberries компаниясынын кампа жана логистикалык инфраструктурасындагы үзгүлтүктөргө байланыштуу болушу мүмкүн.
Электр энергиясы, газ жана буу менен камсыз кылуу 0,2%га кыскарды. Буга электр энергиясын өндүрүүнүн 5,1%га төмөндөшү себеп болгон.
Суу менен жабдуу, тазалоо жана калдыктарды иштетүү тармагындагы өндүрүш көлөмү 17,3%га өстү.
Өнөр жай өндүрүшүнүн ИДПнын өсүшүнө кошкон салымы 2 пайыздык пунктту түзүп, ИДПнын өндүрүш түзүмүндөгү үлүшү 19,6% болду.
