Кыргызстанда социалдык кызматкерлердин айлыгы 40 миң сомго чейин жогорулады
Кыргызстанда социалдык кызматкерлердин орточо айлыгы кошумча төлөмдөр жана үстөк акыларды эске алуу менен 40 миң сомго чейин жогорулады. Бул тууралуу Эмгек, социалдык камсыздоо жана миграция министрлигинин басма сөз кызматы билдирди.
Маалыматка ылайык, буга чейин алардын орточо маянасы 12 миң сомдун тегерегинде болгон.
Эмгек акыны жогорулатуу президент Садыр Жапаровдун 26-марттагы бюджеттик чөйрөнүн айрым кызматкерлеринин эмгек акы төлөө шарттарын өркүндөтүү жөнүндө жарлыгынын алкагында жүргүзүлгөн.
Белгиленгендей, учурда республика боюнча 545 социалдык кызматкер эмгектенет. Бул бекитилген штаттык бирдиктердин 99%ын түзөт.
Отчеттук мезгилде социалдык кызматкерлер турмуштук оор кырдаалда турган 3,6 миң баланы аныкташкан. Жүргүзүлгөн иштердин натыйжасында 1 702 баланын кырдаалы жакшырган.
