Ала-Букада атайын техникаларга 19 млн сомдон ашык каражат жумшалды
Ала-Бука районунун Төрөгелди Балтагулов айыл аймагына жалпы 19 млн 437 миң сомго атайын техникалар жана автоунаа сатып алынды. Бул тууралуу аймактык мамлекеттик админстрациядан билдиришти.
Маалыматка ылайык, райондук өнүктүрүү фондунун каражатынан 18 млн 287 миң сомго үч атайын техника алынган. Алардын катарында 10 млн 300 миң сомдук экскаватор, 4 млн 687 миң сомдук "Хово" жүк ташуучу унаасы жана 3 млн 300 миң сомдук таштанды ташуучу унаа бар.
Мындан тышкары, жергиликтүү казынанын эсебинен 1 млн 150 миң сомго "Hyundai Porter" үлгүсүндөгү автоунаа сатып алынган.
Белгиленгендей, жаңы техникалар айыл аймагын көрктөндүрүү, тазалык иштерин жүргүзүү жана коммуналдык кызматтардын сапатын жогорулатуу үчүн пайдаланылат.
