Балыкчыда 7 облустун өзгөчөлүгүн чагылдырган этнопарк курулуп жатат
Балыкчы шаарында аянты 3,1 гектарды түзгөн этнопарк курулууда. Бул тууралуу калаа мэриясынын басма сөз кызматы билдирди.
Маалыматка ылайык, долбоор Ысык-Көлдүн кире беришин көрктөндүрүү жана туризмди өнүктүрүү максатында ишке ашырылууда.
Этнопаркта Кыргызстандын жети дубанынын өзгөчөлүгүн, кыргыздын улуттук колоритин, маданиятын чагылдырган жайлар жана экспозициялар орун алат. Кире бериш бөлүгүнө "Ак-Кеме" сымал арка курулууда.
Ошондой эле аймакта 500 автоунаага ылайыкталган унаа токтотуучу жай каралган. Долбоорду 2027-жылы жазда аяктоо пландалууда.
Белгилей кетсек, президент Садыр Жапаровдун тапшырмасы менен Балыкчы шаарын өнүктүрүүгө 1 млрд сом бөлүнгөн. Каражатка шаарда жаңы бекет, муниципалдык базар, балык базары, этнопарк жана башка объектилер курулуп, заманбап экологиялык чечимдер киргизилүүдө.
