"Джунда“ заводунда Евро-5 күйүүчү майын өндүрүү пландалууда
Кыргызстанда "Джунда" мунайды кайра иштетүүчү заводун модернизациялоо долбоорунун кийинки этабы башталат. Бул тууралуу Инвестициялар боюнча улуттук агенттиктен билдиришти.
Бүгүн агенттиктин башчысы Равшанбек Сабиров Министрлер Кабинети менен "Борбордук Азия энергетикалык компаниясы" ЖЧКсынын ортосундагы инвестициялык келишимге өзгөртүүлөрдү киргизүү боюнча кошумча келишимге кол койду.
Документ "Джунда" заводун модернизациялоо долбоорунун кийинки этабын ишке ашырууга мүмкүнчүлүк берет.
Модернизациянын алкагында мунай заттарын өндүрүүнүн көлөмүн көбөйтүү жана сапатын жогорулатуу каралган. Жаңыланган заводдо заманбап талаптарга, анын ичинде Евро-5 стандартына жооп берген күйүүчү май өндүрүү пландалууда.
Маалыматка ылайык, долбоор ички рынокту күйүүчү-майлоочу материалдар менен камсыздоону жакшыртып, өлкөнүн отун-энергетика тармагынын туруктуулугун жогорулатууга багытталган.
Ошондой эле долбоордун ишке ашырылышы мунайды кайра иштетүү тармагын өнүктүрүүгө, жаңы жумуш орундарын түзүүгө жана өндүрүштүк мүмкүнчүлүктөрдү кеңейтүүгө шарт түзөрү белгиленди.
