Кыргызстанда бензиндин баасын туруктуу кармоо үчүн 956 млн сом бөлүндү
Кыргызстанда бензиндин чекене баасын туруктуу кармоо үчүн мунай ташуучу компанияларга 956 млн 139 миң сом мамлекеттик субсидия бөлүндү. Бул тууралуу Министрлер Кабинетинин төрагасы Адылбек Касымалиев өлкөнүн ички рыногун күйүүчү-майлоочу материалдар менен камсыздоо маселеси талкууланган жыйында билдирди.
Маалыматка ылайык, субсидия күйүүчү-майлоочу материалдардын иш жүзүндөгү наркы менен чекене баасынын ортосундагы айырманы компенсациялоого багытталган. Мунай заттарынын түрүнө жараша бул айырма бир литрине болжол менен 20 сомдон 40 сомго чейин жетет.
Адылбек Касымалиев күйүүчү майдын баасы калктын жашоо деңгээлине терс таасирин тийгизбеши керектигин белгилеп, баалардын айырмасын субсидиялоо иши мындан ары да улантыларын билдирди.
Ошондой эле мамлекеттик субсидия өз убагында бөлүнүп жаткандыктан, компаниялардын аймактардагы май куюучу жайлары толук иштеп, күйүүчү май сатууда чектөөлөр болбошу керектиги айтылды.
Жыйындын жыйынтыгында өлкөнү мунай заттары менен үзгүлтүксүз камсыздоо, рыноктогу абалга мониторингди күчөтүү, импорт боюнча жаңы келишимдерди түзүү жана жаңы механизмдерди кароо боюнча тиешелүү органдарга тапшырмалар берилди.
Мындан тышкары, чек арадагы логистикалык маселелерди чечүү жана мунайды кайра иштетүүчү заводду модернизациялоо иштерин өз мөөнөтүндө аяктоо тапшырылды.
