Манас шаарында президенттик лицейдин курулушунда 443,5 млн сом үнөмдөлдү
Манас шаарындагы "Акылман" президенттик мектеп-лицейиндеги курулуш иштери аяктоо алдында турат. Бул тууралуу Курулуш, архитектура жана турак жай-коммуналдык чарба министрлигинин басма сөз кызматы билдирди.
Долбоорго ылайык, мекемеде 360 орундуу окуу корпусу, 410 орундуу жатакана, мугалимдер үчүн 25 батирден турган беш кабаттуу турак жай, лабораториялар, китепкана, 25 метрлик бассейн, спорт залы жана стадион болот.
Буга чейин объекттин долбоордук-сметалык баасы кайра каралып, мамлекеттик каражаттарды үнөмдөө боюнча иштер жүргүзүлгөн. Алгач анын наркы 2,1 млрд сомдон ашык болуп, курулуштун бир чарчы метринин баасы 1 103 долларды түзгөн.
Кайра эсептөөнүн жыйынтыгында бир чарчы метрдин наркы 750 долларга чейин төмөндөтүлүп, жалпы сметалык баасы 1,7 млрд сом деп такталган. Натыйжада мамлекеттик казынадан 443,5 млн сом үнөмдөлгөн.
Белгиленгендей, президенттик лицей жаңы окуу жылында ишке кирет.
