Жогорку технологиялар жана Креативдүү индустриялар паркы үчүн салыктык каттоо жеңилдетилди
Мамлекеттик салык кызматы Жогорку технологиялар паркынын жана Креативдүү индустриялар паркынын резиденттери үчүн салыктык каттоо жана атайын салык режимин колдонуу процессин автоматташтырды. Бул тууралуу Салык кызматынан билдиришти.
Маалыматка ылайык, Салык кызматы эки парктын маалыматтык системаларын интеграциялады. Эми резидент статусун алган салык төлөөчүлөр тууралуу маалымат Салык кызматына электрондук түрдө жөнөтүлөт.
Мындан ары резиденттерге салык органына кагаз түрүндөгү документтерди же арыздарды өз алдынча тапшыруунун зарылдыгы жок. Керектүү маалыматтар тиешелүү маалыматтык системалардын ортосунда электрондук түрдө өткөрүлөт.
Салык кызматы жаңы система кагаз документ жүгүртүүнү жана административдик жол-жоболорду кыскартып, салык төлөөчүлөрдүн убактысын үнөмдөөгө жана тиешелүү салык режимин ыкчам колдонууга шарт түзөрүн белгиледи.
