Экономика

Эсептөө палатасы бюджеттеги кемчиликтерди четтетүү боюнча сунуштарды берди

Уулжан Бейшенбекова

26 авг 2026 19:21

2025-жылдагы республикалык казынанын аткарылышы боюнча жүргүзүлгөн аудиттин жыйынтыгы чыкты. Бул тууралуу Эсептөө палатасынын басма сөз кызматы билдирди.

Анализде бюджеттик тартипти чыңдоо, каржылык отчеттуулукту жакшыртуу жана санариптик тутумдарды толук киргизүү зарылдыгы белгиленди. Анын ичинде борборлоштурулган бухгалтердик эсептин автоматташтырылган маалыматтык тутумуна мекемелердин 71%га гана өткөнү көрсөтүлдү.

Тоо-кен тармагындагы салык мыйзамдарын өркүндөтүү, салык чендерин өз убагында өзгөртүү жана тармактык ишканалардын милдеттүү төлөмдөрүн казынага толук түшүрүү аркылуу кошумча киреше алуу мүмкүнчүлүгү бар экени айтылды.

Мындан тышкары, мамлекеттик карызды жана каржылык активдерди башкарууну жакшыртуу, мамлекеттик акциялар пакеттерин эсепке алуу иштерин иретке келтирүү зарылдыгы белгиленди.

Эсептөө палатасы аныкталган кемчиликтерди четтетүү жана мамлекеттик каражаттарды пайдалануунун ачыктыгын жогорулатуу максатында Министрлер Кабинетине, Финансы министрлигине жана мамлекеттик органдарга тиешелүү жазма буйруктар менен сунуштамаларды жөнөттү.

Кыргызстандын экономика, бизнес, финансы тармактары боюнча маалыматтарды, ийгиликтүү ишкерлер менен болгон кызыктуу маектерди – Ишкер MEDIA сайтынын Telegram, Facebook, Instagram, Threads, Х жана YouTube каналдарынан окуп, көрүп туруңуздар. Ишкер MEDIA менен Сиз ийгиликке жетишесиз!