Кашка-Сууда 127,9 млн долларлык тоо-туристтик кластер курулат
27-августта Инвестициялар боюнча улуттук агенттикте "Baytik Mountain Resort" жыл бою иштей турган тоо-туристтик кластерин түзүү боюнча мамлекеттик-жеке өнөктөштүк тууралуу үч тараптуу келишимге кол коюлду. Бул тууралуу агенттиктин басма сөз кызматы билдирди.
Маалыматка ылайык, документ Кыргызстанда Туризмди өнүктүрүүнү колдоо фондунун ачык акционердик коому, "Valmont Group" ЖЧКсы жана Инвестициялар боюнча улуттук агенттиктин ортосунда түзүлдү.
Долбоор Чүй облусунун Кашка-Суу айылында заманбап, жыл бою иштей турган тоо-туристтик кластерди түзүүнү карайт. Аймакка тоо лыжа трассалары, асма жолдор, жасалма кар жаадыруу тутумдары, жайкы эс алуу жайлары, мейманкана, ресторан, SPA-комплекстери, MICE-борборлор курулат.
Долбоордун жалпы наркы 127,9 млн долларды түзөт. Каржылоо China National Heavy Machinery Corporation (CHMC) стратегиялык өнөктөшүнүн EPC+F модели боюнча каржылоосу, "Элдик Банктын" насыялык каражаттары, жеке өнөктөштүн өздүк каражаттары жана мыйзамдарда тыюу салынбаган башка булактардын эсебинен жүргүзүлөт.
Белгиленгендей, долбоордун курулуш этабында кеминде 1 500 жумуш ордун, ал эми объект пайдаланууга берилгенден кийин 800дөн кем эмес туруктуу жумуш ордун түзүү көздөлүүдө. Алардын 80%ы Кыргызстандын жарандарына берилүүгө тийиш.
Мындан тышкары, долбоордун алкагында Smart Resort санариптик башкаруу тутумун, энергияны үнөмдөөчү чечимдерди, кайра жаралуучу энергия булактарын жана заманбап экологиялык технологияларды киргизүү каралган.
Жеке өнөктөш долбоорду каржылоо, куруу, жабдуу, пайдаланууга берүү жана андан ары техникалык тейлөө боюнча милдеттенмелерди өзүнө алат. Инфраструктуранын биринчи кезегин 4–5 жыл аралыгында пайдаланууга берүү пландалууда.
"Baytik Mountain Resort" долбоору жыл бою иштей турган туристтик тармактын мүмкүнчүлүгүн жогорулатууга жана узак мөөнөттүү инвестицияларды тартууга багытталганы белгиленди.
