Ноокаттагы жаңы завод жылына 100 миң тонна жер семирткич өндүрөт
Ноокат районунун Т. Кулатов айылында курулган "Кыргыз жер семирткич" ишканасы расмий ишке кирди. Ачылыш аземине президенттин өзгөчө тапшырмалар боюнча атайын өкүлү Бакыт Төрөбаев катышып, ишкананын иши менен таанышты.
Аймактык өкүлчүлүктөн билдиришкендей, заводдун биринчи этабында жылына 100 миң тонна жер семирткич өндүрүлөт. 2028-жылга чейин өндүрүш кубаттуулугун 1 миллион тоннага жеткирүү жана 2 миң жумуш ордун түзүү көздөлүүдө.
Маалыматка ылайык, ишканада аммофос жана NPK аралаш жер семирткичтери өндүрүлөт. Долбоор кытайлык инвесторлордун колдоосу менен ишке ашырылып, 15 миллион долларлык заманбап жабдуулар орнотулууда.
Белгиленгендей, алгачкы өндүрүмдөн Бишкек жана Ош шаарларынын дыйкандарына 200 тонна жер семирткич акысыз таратылды. Ишкана аркылуу өлкөнүн ички муктаждыгын камсыздап, ошондой эле экспортко чыгаруу мерчемделген.
