Кыргызстан менен Египет экономикалык кызматташтыкты кеңейтет
Экономика жана коммерция министри Бакыт Сыдыков ШКУга мүчө мамлекеттердин башчыларынын саммитине катышуу үчүн келген Египеттин премьер-министринин экономикалык маселелер боюнча орун басары Хуссейн Эйсса менен жолугушту.
Экономика министрлигин басма сөз кызматы билдиргендей, тараптар кыргыз-египет кызматташтыгын: өз ара соода жүгүртүүнү, эки өлкөнүн бизнес өкүлдөрүнүн ортосунда түз байланыштарды кеңейтүү жана инвестицияларды тартуу маселелерине өзгөчө көңүл бурушту.
Мындан тышкары, өнөр жай, айыл чарбасы, энергетика, туризм, фармацевтика жана башка келечектүү тармактарда биргелешкен долбоорлорду ишке ашырууга кызыкдар экендиктерин билдиришти.
Тараптар ошондой эле президент Садыр Жапаровдун 2025-жылы ноябрда Египетке болгон расмий иш сапарынын жыйынтыгында жетишилген макулдашууларды жүзөгө ашыруунун маанилүүлүгүн айтышты.
Жолугушуунун соңунда эки тараптуу кызматташтыктын келишимдик-укуктук базасын мындан ары өнүктүрүү экономикалык байланыштарды чыңдоонун маанилүү механизми экени белгиленди.
